2020年英超第一擊，周三晚上白禮頓主場挑戰車路士。車仔今季客場表現遠勝主場，尤其造訪實力較弱嘅對手絕冇甩拖，況且「海鷗」白禮頓遇強即屈，呢場都唔慌會搶到分，客勝係不二之選。

車路士繼早前以2比0輕取熱刺之後，上場再以2比1反勝阿仙奴，連續2次喺作客情況下喺「倫敦打吡」贏波，其中前鋒譚美阿巴謙上仗又有士哥，狀態勇銳。事實上，車仔客場成績明顯叻過主場，開咧至今作客已取得21分，遠多過主場嘅14分，對手坐鎮主場同樣主動出擊，明顯益咗一班車仔攻擊好手，畀佢哋有更多空間發揮進攻才能，表現自然較為理想。

白禮頓快車期3戰得1勝2負，無論狀態同戰力均不及車路士，而且白禮頓不嬲有「揀波踢」嘅習慣，尤其面對聖誕新年密集賽程，「海鷗」為保留體力，遇上超班對手都派出副選應戰，留力同實力更接近嘅球隊搏殺，佢哋嚟緊足總盃要對錫周三，大有機會過關，領隊樸達或會再收起部分主力。況且兩軍近5次聯賽碰頭，車仔獲得全勝佳績，白禮頓難有復仇本錢，一於捧車路士客勝。

至於曼城主場鬥愛華頓。「拖肥糖」自安察洛堤上任領隊之後表現翻生，其中前鋒卡維特利雲頻頻有士哥搶晒鏡，呢場對住攻強守弱嘅「藍月亮」，兩軍有本錢上演入球大戰，中位數3.5球入球大值博。

「拖肥糖」上仗喺快車賽期第3站，以2比1擊敗紐卡素，為新帥安察洛堤取得執教以嚟2連勝，其中2場都有波入嘅前鋒卡維特利雲，上場梅開二度，近2場個人包辦3個入球，喺「肥安」調教下成功開竅。查實「肥安」過往2次同哥迪奧拿交手都贏到波，呢位意大利名帥13/14年歐聯4強帶領皇家馬德里，主客兩回合分別以1比0及4比0雙殺由哥帥執教嘅拜仁慕尼黑，可見佢對哥帥嘅踢法絕對唔陌生。

曼城王牌前鋒阿古路近期復出後，上場就為球隊射入打破僵局嘅入波，不過阿古路近年面對愛華頓好少踢足全場，皆因陣中仲有「拖肥剋星」加比爾捷西斯。耶穌仔近4次交手都入到愛華頓波，成為曼城近4次對賽全勝嘅功臣，其中3次開4球或以上。曼城後防不穩已經係公開秘密，計埋盃賽，近15場只有1次保持不失，愛華頓戰術大師安察洛堤點會放過呢個弱點，今場中位數3.5球入球大肯定係首選。