周五凌晨英冠焦點戰，打比郡主場與班士利上演下游生死鬥。上仗贏波嘅打比郡結束連續多場不勝嘅頹勢，士氣返晒嚟，呢場重量級球星朗尼加盟後有機會首次披甲，有助加強球隊攻力，雙方務求新年第一擊做齣好戲，肯定主動搶攻，中位數2.5球入球大值博。

早前連續7輪聯賽不勝嘅打比郡，喺2019年最後一戰主場面對查爾頓踢出爭氣波，雖然早早就因基斯甸比歷紅牌被逐打少個，好彩球隊靠小將積遜禮特梅開二度，最終以2比1逆轉取得久違勝仗，盡顯球隊鬥志。打比郡新年第一擊將有強援朗尼隨時候命，呢位34歲前英格蘭國腳離開美職華盛頓聯重返英倫，加盟打比郡咁耐只能隨隊跟操，等到1月終於可以落場滿足「波癮」，相信有力增強打比郡戰力。

班士利積分榜深陷降班區，為護級肯定要搶分，呢場焗住要攻。睇番往績，兩軍近5次交手全開3球或以上，每次比賽場面都頗為開放，呢場雙方都希望喺新年首戰取得好成績，踢法必然進取，入球騷走唔甩，一於捧中位數2.5球嘅入球大。

同時開波仲有場史雲斯主場對查爾頓，聯賽開局強勢嘅史雲斯，近期走勢下滑，不過佢哋距離升班附加賽席位只差一點點，仲有大把機會慢慢追，頭號射手安祖阿休近5仗上陣入5球，絕對係入波嘅保證。反觀查爾頓近9場作客未贏過，但話晒新年第一戰，就算攞唔足3分都要踢出氣勢，球隊近8場作客7次開3球或以上，呢次造訪史雲斯必定再同對手鬥攻，都係捧中位數2.5球嘅入球大。

今晚英超聖誕新年快車壓軸戰，「1哥」利物浦喺主場迎戰錫菲聯。紅軍嘅晏菲路主場威力強勁，今季聯賽主場贏晒，而且經常由頭贏到尾，撞正啱啱被打破客場不敗身嘅錫菲聯，勢必再做急先鋒，1.58倍半場主勝有計。

紅軍強勢未止，去年尾喺卡塔爾捧走世冠盃後，回國即以4比0作客大炒「2哥」李斯特城，上輪主場再贏狼隊，弗到漏油。除咗前線3叉戟穆罕默德沙拿、沙迪奧文尼及羅拔圖法明奴，奇兵奧歷治亦隨時候命，仲有助攻力極強嘅兩位翼衞阿歷山大阿諾特及安德魯羅拔臣，真係全民皆攻。

另一邊廂，升班球隊錫菲聯今季表現唔錯，可惜後備力量嚴重不足，嚟到聖誕新年快車嘅頻密賽期即顯疲態，先係僅勝白禮頓、再同屈福特打和1比1，上仗作客全場死守之下，仍淨吞曼城兩蛋，今季聯賽作客不敗身被打破之餘，體力消耗極大未回得切氣，仲要造訪紅軍堅難捱。何況利物浦嘅晏菲路主場威力強勁，今季10場主場聯賽全勝，其中9仗更喺上半場領先，預計佢哋一開波會即刻搶攻，半場主勝值得捧場。